Në një tjetër krim çnjerëzor, regjimi iranian ka ekzekutuar një tjetër grua në periudhën që i paraprin fillimit të vitit 2021. Përpjekja e saj dhe e familjes së saj për të siguruar 28,000 dollarë si para gjaku dështoi në momentin e fundit.

Më 27 dhjetor, autoritetet iraniane ekzekutuan 43-vjeçaren Zeinab Khodamoradi në Burgun Qendror të Sanandaj në provincën Kurdistan të Iranit perëndimor. Sipas aktivistëve të të drejtave njerëzore, ajo ishte nga krahina Qorveh.

Shoqata Jo Burgut – Jo Ekzekutimit ka raportuar se Forcat e Sigurisë së Shtetit (SSF) e kishin arrestuar Zeinab Khodamoradi-n për vrasjen e fëmijëve të saj më 31 gusht 2015—që do të thotë se ajo ka kaluar mbi pesë vite në pritje të ekzekutimit.

“Për shkak të presionit të ushtruar nga i shoqi, dhe gjendjes së rëndë mendore të saj, kjo grua vrau djalin e saj 12-ditësh, Mohammad Javad, dhe vajzën shtatë vjeçare, Hadis, të të shoqit” thonë mbrojtësit e të drejtave njerëzore.

Zeinab Khodamoradi më vonë tentoi të vriste veten, por dështoi në momentin e fundit, sipas shoqatës Jo Burgut – Jo Ekzekutimit. “Para se ta kryente krimin, ajo kishte shkruar në këmbë se, ‘për shkak të bashkëshortit dhe nënës e motrës së tij, i jap fund jetës sime dhe jetës së fëmijëve,” raportojnë aktivistët.

Në tetor, autoritetet e transferuan atë në burgim të izoluar për të implementuar dënimin me vdekje. Ndërkohë, familja e të shoqit kishte rënë dakord që të hiqej dënimi me vdekje në këmbim të 7 bilion rialëve [$28,000] si Dieh [para gjaku në kushtetutën e Republikës Islamike]. Por në fund, kjo grua fatkeqe nuk arriti ta siguronte këtë shumë kaq të madhe parash deri në afatin e specifikuar.

Tre të burgosur kanë vdekur në burgun Evin të Teheranit në periudhën midis 24 dhe 28 dhjetorit. Këta tre të burgosur vuanin nga COVID-19 por ishin braktisur nga zyrtarët e klinikës së burgut Evin, dhe ishin lënë pa asnjë trajtim mjekësor.

Të hënën më 28 dhjetor, Amir Hossein Mottaghian vdiq nga COVID-19 në pavijonin 4 të burgut Evin. Ai u rrëzua përtokë dhe humbi ndjenjat. Ai vdiq pas transferimit në klinikën e burgut. Zyrtarët e klinikës thanë se ai kishte vdekur nga një ndërprerje e furnizimit të trurit me gjak.

Ai kishte kontaktuar me klinikën më 27 dhjetor dhe kishte kërkuar trajtim, por autoritetet e klinikës e kishin nxjerrë jashtë. Pas 24 orësh, atij i ra të fikët dhe shokët e qelisë e çuan në klinikë por ishte tepër vonë.

Të burgosurit protestuan ndaj vdekjes së tij të shkaktuar nga mungesa e trajtimit mjekësor, por mjeku i burgut dhe autoritetet e klinikës i trajtuan keq protestuesit.

Abdolhamid Mir-Baluchzehi

Regjimi iranian ekzekutoi të shtunën Abdolhamid Mir-Baluchzehi, një të burgosur politik në Zahedan të Iranit jug-lindor. Ekzekutimi i Mir-Baluchzehi u bë dy javë pas varjes së 13 të burgosurve nga regjimi në Iran, duke përfshirë Ruhollah Zam, banues në Europë.

Këto varje brutale nënvizojnë domosdoshmërinë që komuniteti ndërkombëtar të marrë masa decizive kundër shkeljeve të të drejtave njerëzore në Iran.

Më 12 dhjetor, njëkohësisht me zhvillimin e një forumi biznesi me vendet europiane, regjimi vari shtetasin Zam. Një javë më parë, Bashkimi Europian kishte miratuar një regjim të ri global sanksionesh kundër shkelësve të të drejtave njerëzore.

Vetëm një ditë pas Krishtlindjeve, regjimi iranian e ngriti rekordin e dënimeve me vdekje të 2020-ës në 254 raste me katër ekzekutime të reja, duke përfshirë tre të burgosur iranianë të minoritetit Baluch.

Më 26 dhjetor, autoritetet iraniane ekzekutuan të paktën katër të burgosur, sipas shoqatës Jo Burgut – Jo Ekzekutimit. Këto dënime janë kryer në Burgun Qendror të Zahedan-it, në Iranin jug-lindor, dhe në Burgun Qendror të Qom-it, në jug-perëndim të Teheranit.

Ndërkohë në Zahedan, rojat e burgut e çuan në trekëmbësh 43-vjeçarin Yasin Abdollahi. Por në momentin e fundit, refuzuan ta ekzekutonin. Autoritetet iraniane i përdorin shpesh ekzekutimet false me qëllimin për t’ua thyer guximin të burgosurve. Që në fillim të 2020-ës, regjimi iranian ka ekzekutuar të paktën 254 të burgosur, duke përfshirë 16 gra dhe tetë shkelës minorenë të ligjit, sipas grupeve të të drejtave njerëzore.

I burgosuri politik Afshin Shahsavari

Thirrje që një komision ndërkombëtar hetimi të vizitojë burgjet iraniane dhe të takohet me të burgosurit politikë

Të premten, më 25 dhjetor 2020, Afshin Shahsavari, një mbështetës i Mujahedin-e Khalq (MEK/PMOI) që mbahet si i burgosur politik, është rrahur gati për vdekje në burgun Evin.

Incidenti nisi kur Afshin Shahsavari protestoi ndaj ngacmimit të dy të burgosurve jo-politikë nga rojat e burgut në sektorin e karantinës të pavijonit katër të burgut Evin. Më pas, më shumë se dhjetë roja dhe anëtarë të njësisë së forcave speciale të Evin-it e sulmuan atë, e nxorën me forcën në oborrin e burgut, e hodhën në tokën e mbuluar nga bora, dhe vazhduan ta torturonin e rrihnin brutalisht duke e goditur me çizme. Si rrjedhim, ai pësoi çarje në fytyrë pranë vetullave, gjakosje të hundës, nxjerrje të shpatullës, dhe mavijosje nëpër trup. Sipas një dëshmitari, rojat kishin vazhduar ta rrihnin në mënyrë barbare edhe pse ai i kishte humbur ndjenjat. Më pas e kishin rikthyer në qeli pa asnjë përkujdesje për plagët e tij.

Tre rojat kriminelë të përfshirë në këtë rrahje brutale janë identifikuar si Jalal Mobini, Mehdi Mahmouli, dhe Amrollahi.

Afshin Shahsavari, 38 vjeç, është dënuar me tre vite e gjysëm dhe ka qenë në burg që në mars 2019.

Rezistenca Iraniane nxit Sekretarin e Përgjithshëm të Kombeve të Bashkuara, Komisioneren e Lartë të OKB-së për të Drejtat e Njeriut, Këshillin e të Drejtave të Njeriut, dhe raportuesit përkatës të OKB-së, si dhe organizatat ndërkombëtare të të drejtave njerëzore, që të marrin masa urgjente për të ndaluar torturimet dhe ekzekutimet në Iran, dhe përsërit thirrjen e saj për formimin e një komisioni ndërkombëtar hetimi i cili të vizitojë burgjet iraniane dhe të takohet me të burgosurit, sidomos të burgosurit politikë.