Hassan Nasrallah takohet me Ali Khamenei dhe Qassem Soleimani në Iran

Në Iran shpërthyen protesta në dhjetor 2017 dhe nëntor 2019, me njerëzit që fillimisht u kërkuan autoriteteve të adresonin problemet e tyre ekonomike. Regjimi u përgjigj me plumba. Ndërkohë, kur i pyesin për rënien e madhe ekonomike të Iranit, mullahët dhe apologjetët e tyre fajësojnë sanksionet.

Irani është vendi i dytë në botë për rezervat më të mëdha të gazit natyror dhe i katërti për rezervat më të mëdha të naftës. Irani ka gjithashtu shumë burime të tjera natyrore. E megjithatë, njerëzit protestojnë çdo ditë për varfërinë dhe rritjen e inflacionit.

Për çfarë shpenzohet pasuria kombëtare e Iranit? A do ta ringjallë ekonominë iraniane dhe t’i ndihmojë të varfrit promovimi i biznesit me Iranin, që është tani në krye të agjendës së Bashkimit Europian?

Lideri Suprem i regjimit iranian, Ali Khamenei, dhe Garda Revolucionare (IRGC) dominojnë ekonominë e Iranit përmes 14 kompanive enegjitike dhe qindra kompanive frontale. Raporti i plotë i këtyre kompanive energjitike, i publikuar rishtazi nga Këshilli Kombëtar i Rezistencës së Iranit (NCRI), mund të gjendet këtu.

Për shkak të korrupsionit të institucionalizuar të regjimit dhe pastrimit sistematik të parave që bëhet me qëllimin për të vazhduar financimin e grupeve terroriste, Taskforca për Veprim Financiar (FATF) e ka përfshirë regjimin në listën e zezë të saj.

Faktet e listuara më poshtë pasqyrojnë se si e përdor regjimi pasurinë kombëtare:

1. Forca Quds e IRGC-së, sidomos kur ishte nën komandën e Qassem Soleimani-t, krye-mjeshtrit të eliminuar terrorist të Iranit, ka financuar grupe terroriste si Hezbollah.
2. Mahmoud al-Zahar, një anëtar i lartë i udhëheqjes së Hamas, tha të dielën për Al-Alam, rrjetin në gjuhën arabe të televizionit shtetëror të Iranit, se gjatë një takimi në 2006-ën me Qassem Soleimani në Teheran, ai i kishte shpjeguar Soleimani-t “problemin themelor të stafit dhe shërbimeve shoqërore të popullit të Gazës.” “Haj Qassem iu përgjigj menjëherë kërkesës sonë, kështu që ditën e nesërme, kur do të ktheheshim, pashë 22 milion dollarë në bagazhet tona në aeroport.”

3 janari shënon një-vjetorin e vdekjes së ish-komandantit të Forcave Quds të Korpusit Revolucionar Islamik (IRGC). Për ta lavdëruar Qasem Soleimani-n dhe për të theksuar imazhin e tij si “hero” për grupet proksi të Iranit, organizatat terroriste në Liban e Palestinë po ua bëjnë të ditur ndjekësve të tyre se sa shumë do t’u mungojë ky person.

Më 27 dhjetor, një anëtar i lartë i grupit terrorist palestinez Hamas tha për Arab TV të regjimit iranian se Soleimani i kishte dhënë atij dhe shoqëruesve të tij $22 milion kesh.

Mahmoud Al-Zahar tha për Al-Alam se në takimin e tij të parë e të fundit me Soleimani-n në Teheran në 2006-ën, kishte kërkuar para dhe kërkesa i ishte plotësuar “me shpejtësi.”

“Vendimi u mor shpejt. Duhej të udhëtoja të nesërmen. Në aeroport, pashë disa çanta me 22 milion dollarë. Marrëveshja jonë me Soleimani-n ishte për më shumë se kaq, por ngaqë ishim vetëm nëntë veta, nuk mund të mbanim një shumë më të madhe. Secila prej çantave mund të mbante 40kg,” tha ai.

Al-Zahar është një nga bashkë-themeluesit e Hamas dhe anëtar i udhëheqjes së Hamas në Rripin e Gazës.

Kjo nuk është hera e parë që ndihmat financiare dhe logjistike të Iranit për Hamas bëjnë bujë në media.

Vitin e shkuar, Sami Abu Ayadah, kryetar i “Komitetit të Dëshmorëve” në Shoqatën e Bamirësisë al-Ansar, pati thënë se Irani u kishte dhënë ndihmë financiare çdo tre muaj 9,000 familjeve të dëshmorëve palestinezë (7,000 në Rripin e Gazës dhe 2,000 në Bregun Perëndimor).

Abu Ayadah tha se Shoqata e Bamirësisë al-Ansar, e cila përdoret nga regjimi iranian për të paguar anëtarët e Hamas, “ofron ndihmë financiare prej $600 çdo tre muaj për familjen e një dëshmori që ka qenë i martuar, dhe $300 për familjen e një dëshmori të pamartuar.”

Në po atë ditë, Sekretari i Përgjithshëm i Hezbollah, një grup terrorist libanez i themeluar nga regjimi iranian, e lavdëroi gjithashtu Soleimani-n për “mbështetjen e tij logjistike” në drejtim të Hamas dhe tha se ai nuk kishte njohur “asnjë vijë të kuqe” në dërgimin e raketave 9M133 Kornet në Gaza për Hamas dhe për Jahad-in Islamik.

Hassan Nasrallah ka thënë për kanalin e lajmeve pro-Hezbollah, Al Mayadeen, se komandanti i vdekur i Forcave Quds e ka ndihmuar financiarisht grupin terrorist libanez “në mënyrë të papritur dhe në prapaskenë”.

Mohsen Baharvand, Zëvendës Ministër për Punët Ligjore dhe Ndërkombëtare i Ministrit të Jashtëm të Iranit, Mohammad Javad Zarif, ka nënvizuar të hënën marrëdhënien e ngushtë të Zarif me krye-mjeshtrin e eliminuar terrorist të regjimit, Qassem Soleimani. Komentet e Baharvand nënvizojnë faktin se nuk ka asnjë ndryshim midis “apologjetit kryesor” të Iranit, Zarif, dhe “terroristit kryesor” të mullahëve, Qassem Soleimani.

Baharvand i publikoi këto shënime në ditën përpara përvjetorit të vdekjes së Soleimani më 2 janar 2020.

“Nuk do ta harroj kurrë se kur shkoja në Zyrën e Studimeve Politike të Ministrisë së Punëve të Jashtme, pothuajse çdo të martë në 7:30 të mëngjesit për të marrë pjesë në një mbledhje strategjike mbi marrëdhëniet ndërkombëtare, shihja dëshmorin e lavdishëm, Gjeneralin Haj Qassem Soleimani, i cili përcillej jashtë sallës së mbledhjes nga Dr. Zarif,” shkruan Baharvand sipas agjencisë zyrtare të lajmeve ILNA.

Baharvand theksoi se Soleimani “vinte rregullisht në zyrën e studimeve në 6 të mëngjesit të martave dhe zhvillonte një takim koordinimi me Dr. Zarif deri në orën 7:30.”

Kush Ishte Qassem Soleimani?

Qassem Soleimani ishte komandanti i Forcave terroriste Quds të Iranit, një krah jashtë-territorial i Gardës Revolucionare (IRGC). I lindur në vitin 1957, Soleimani iu bashkua IRGC-së gjatë viteve të para të Luftës Iran-Irak. 

Ai u ngrit me shpejtësi deri në majë të komandës së IRGC për shkak të mizorisë së tij dhe besnikërisë ndaj Liderit Suprem të regjimit, Ali Khamenei.

Khamenei e caktoi Soleimani-n si komandant të Forcave Quds në vitin 1998. Forcat Quds luajnë një rol unik në IRGC dhe kanë për detyrë të orkestrojnë ndërhyrjet e regjimit në vendet e Lindjes së Mesme, nga Iraku në Siri dhe Jemen, madje deri në kontinentin afrikan.