Shkruar nga Shahriar Kia

Ndërkohë që numri i vdekjeve nga COVID-19 vazhdon të rritet me shpejtësi në Iran, zyrtarët e regjimit iranian po detyrohen t’i pranojnë disa dimensione të kësaj krize.

Agjencia shtetërore e lajmeve ISNA citoi të dielën Mohammad Kakavand-in, kryetarin e Rrjetit të Shëndetit dhe Trajtimit në Borujerd, duke thënë: “Llogaritjet tona në terren tregojnë se 20 përqind e popullsisë në Borujerd (në Iranin perëndimor) janë infektuar me COVID-19. Për pak kohë, mbi 50 përqind e popullit iranian do të infektohen me këtë virus. Nga ky numër, tre deri në katër përqind do të vdesin, që do të thotë më shumë se një apo dy milion iranianë.”

Ndërkohë, ‌Behrooz Koleidari, Zëvendës Rektor për Trajtimin në Universitetin e Shkencave Mjekësore në Isfahan, tha të shtunën: “Rreth dy javë më parë kishim 320 pacientë të shtruar në qendra të ndryshme mjekësore. Mëngjesin e sotëm, ky numër ka arritur në 567, dhe nga këta 567 pacientë, rreth 136 janë në terapi intensive. Gjithashtu, 74 nga këta pacientë janë nën frymëmarrje artificiale për të vazhduar së qeni gjallë.”

Zyrtarët e regjimit iranian nisën një fushatë keqinformimi dhe fshehjeje faktesh lidhur me COVID-19 që në ditët e para të kësaj krize. Presidenti i regjimit, Hassan Rouhani, ka qenë në avangardë të kësaj fushate. Tani, numri në rritje i viktimave të koronavirusit e ka detyruar Rouhani-n ta pranojë seriozitetin e krizës. Rouhani tha të dielën: “Kanë kaluar rreth gjashtë muaj që kur filloi kjo sëmundje; nuk ka vaksinë; mund të vazhdojë edhe për tre deri në 12 muaj të tjerë; prandaj duhet të përgatitemi për të ardhmen.”

Regjimi i mullahëve nisi ta fshihte realitetin dhe ta zbuste seriozitetin e krizës së COVID-19. Organizata Muxhahedine e Popullit të Iranit (PMOI/MEK) shpalli të dielën se numri i vdekjeve nga koronavirusi e ka tejkaluar shifrën 62,000. Rritja e numrit të vdekjeve nga COVID-19 është rezultat i drejtpërdrejtë i politikave mospërfillëse dhe qëllimisht dëmtuese të regjimit iranian. Regjimi e mohoi ekzistencën e virusit për javë të tëra në mënyrë që të kishte një pjesëmarrje më të madhe në zgjedhjet e rreme parlamentare të shkurtit. Zbulimet e MEK dhe presioni ndërkombëtar e detyruan regjimin ta pranonte ekzistencën e virusit. Atëherë, regjimi i mullahëve nisi ta zbuste seriozitetin e krizës. Regjimi deklaroi një karantinim kombëtar por e anulloi shpejt atë dhe i detyroi njerëzit t’i riktheheshin punës. Rritja e numrit të vdekjeve nga COVID-19 është rezultat i drejtpërdrejtë i planeve të regjimit për të rifilluar veprimtaritë ekonomike dhe shoqërore edhe pse kishte rritje në numrin e rasteve.

Znj. Maryam Rajavi, Presidentja e zgjedhur e Këshillit Kombëtar të Rezistencës së Iranit (NCRI), tha lidhur me këtë çështje se: “Tendenca në rritje e koronavirusit në mbarë vendin është rezultat i drejtpërdrejtë i politikave kriminale dhe çnjerëzore të regjimit klerikal. Khamenei dhe Rouhani janë të parët zyrtarë përgjegjës për humbjen e jetës së bashkatdhetarëve tanë në një shkallë kaq të lartë.”

Znj. Rajavi përsëriti gjithashtu se: “Në vend që ta ndihmonin popullin e Iranit, dhe t’i mbyllnin përkohësisht bizneset jo të domosdoshme, mullahët i dërguan në punë punëtorët, e megjithatë pretendojnë se njerëzit kanë zbatuar më pak se 9 përqind të të gjitha protokolleve të higjienës.”

Tani, teksa numri i vdekjeve nga koronavirusi vazhdon të rritet në Iran, komuniteti ndërkombëtar duhet të veprojë menjëherë dhe ta ndihmojë në mënyrë të pavarur popullin iranian. Sepse, siç ka thënë Znj. Rajavi, “Regjimi çnjerëzor i mullahëve është përgjegjës për valën e re të shpërthimit të sëmundjes dhe rritjen e numrit të viktimave në Iran. Mullahët nuk mendojnë për gjë tjetër përveçse si të vazhdojnë të plaçkisin e ta ruajnë pushtetin e tyre të turpshëm.”

NUMRI I VIKTIMAVE (DERI MË 29 qershor 2020)

Organizata Muxhahedine e Popullit të Iranit (PMOI) shpalli mbasditen e sotme, më 29 qershor 2020, se koronavirusi ua ka marrë jetën mbi 62,600 njerëzve në 341 qytete në mbarë Iranin. Numri i vdekjeve sipas provincave të ndryshme është: 4785 në Khuzestan, 3790 në Khorasan Razavi, 3180 në Gilan, 2295 në Lorestan, 1990 në Alborz, 1415 në Hamedan, 780 në Kerman, 585 në Bushehr, 559 në Zanjan, 540 në Gazvin, 175 në Khorasan Jugor. Kjo është përveç raporteve të marra nga provincat e tjera.

Shkruar nga Sekretariati i Këshillit Kombëtar të Rezistencës së Iranit (NCRI)

Iran: Përditësim Lidhur me Koronavirusin, Mbi 62,100 Vdekje, 28 qershor 2020,

Drejtori i shërbimeve shëndetësore të regjimit në Borujerd: 50 përqind e popullit iranian në prag të infektimit me koronavirus, tre-katër përqind e të cilëve do të vdesin, d.m.th., një deri në dy milion njerëz

• Ministria e Shëndetësisë e ka shpallur numrin e vdekjeve në 24 orët e fundit si 144, numri më i lartë në 85 ditë. 
• Ministria e Shëndetësisë: Pacientët e identifikuar me koronavirus jashtë spitaleve janë dhjetë herë më shumë se ata që konstatohen në spitale 
• Asnjë spital në Teheran nuk është pa virus, dhe të gjitha spitalet po përballen me koronavirusin 
• Iraj Harirchi, Zëvendës Ministër i Shëndetësisë: 11 qytete në Azerbaixhanin Perëndimor janë të kuqe. Pas rihapjes, kemi vënë re një rritje në numrin e pacientëve 
• Televizioni i regjimit: Me shtimin e madh të shtrimeve në spitale, spitalet e Isfahan-it kanë hyrë në një tjetër fazë kritike. Pacientët shtrohen nëpër korridore.

Organizata Muxhahedine e Popullit të Iranit (PMOI/MEK) shpalli të dielën, më 28 qershor 2020, se numri i vdekjeve nga koronavirusi në 340 qytete të Iranit ka shkuar mbi 62,100.

Një zëdhënës i Ministrisë së Shëndetësisë të regjimit tha në një deklaratë se 144 njerëz kanë vdekur gjatë 24 orëve të fundit, numri më i lartë në 85 ditë, dhe se 2,946 pacientë janë vënë në terapi intensive, numri më i lartë në javët e fundit. Ndërkohë, drejtori i Qendrës për Menaxhimin e Sëmundjeve Infektive në Ministrinë e Shëndetësisë tha për të përditshmen shtetërore Aftab më 28 qershor: “Sot, pacientët e identifikuar me koronavirus jashtë spitaleve janë dhjetë herë më shumë se ata që janë identifikuar në spitale … Është e paparashikueshme se çfarë do të ndodhë nëse Koronavirusi do të koinçidojë me gripin e zakonshëm në stinën e ftohtë.”

Kryegjyqtari i Isfahan-it: MEK duhet ta dijë që, nëse ndodh një shkelje [kryengritje] si ato të 2009-ës, 2017-2018 dhe nëntorit të shkuar, ne do të përgjigjeshim me vendosmëri. Verdikti për “korrupsion mbi tokë” është miratuar për tetë raste të lidhura me incidentet e përmendura

Nga frika e mundësisë së protestave dhe kryengritjeve të gjera si dhe e veprimtarive të Njësive të Rezistencës që e thyejnë atmosferën e terrorit dhe frikësimit të regjimit, diktatura fetare në pushtet po përpiqet dëshpërimisht të parandalojë një tjetër kryengritje popullore duke krijuar një atmosferë frike me anë të ekzekutimeve, dënimeve me burgim të gjatë, dhe arrestimit të të rinjve.

Dje, Mohammad Reza Habibi, kreu i Departamentit të Drejtësisë të regjimit klerikal në Isfahan, shprehu frikën e tij për një kryengritje tjetër. “Le ta dinë kukullat e Mujahedin-e Khalq (MEK/ PMOI) se, nëse diçka shkon keq, ashtu siç ndodhi në 2009-ën, në dhjetor 2017 – janar 2018, dhe në nëntor të vitit të shkuar, ne do të përgjigjemi me vendosmëri … Verdikti për ‘korrupsion mbi tokë’ është miratuar për tetë raste të lidhura me incidentet e përmendura,” citohet të ketë thënë ai, sipas agjencisë së lajmeve Mehr, sot. “Korrupsion mbi Tokë” është sajuar nga regjimi dhe ndëshkohet me vdekje.

Në një tjetër zhvillim, Nasruddin Salehi, Prokurori Publik i regjimit në Shahinshahr dhe Meymeh, foli sot për agjencinë zyrtare të lajmeve ISNA, dhe tregoi për dënimet me vdekje dhe burgim ndaj atyre që ai i quajti autorë vjedhjesh të armatosura dhe lider të trazirave të nëntorit të shkuar të cilët “shkatërruan pronat publike me plane të parapërgatitura me detaje.” Ai shtoi: “Verdikti do të ekzekutohet pas miratimit përfundimtar nga prokuroria.” Ai paralajmëroi gjithashtu se: “përhapja e gënjeshtrave, me ose pa qëllim, trazimi i publikut me anë të sistemit dixhital apo të telekomunikacionit, do të ndëshkohen me 91 ditë deri në dy vite burg ose me xhobë ose të dyja.”

Më herët, të burgosurit politikë Amir Hossein Moradi, 26 vjeç, Saeed Tamjidi, 28 vjeç, dhe Mohammad Rajabi, 26 vjeç, u arrestuan për pjesëmarrje në kryengritjen e nëntorit dhe u dënuan me vdekje pasi ishin torturuar për një kohë të gjatë. Tani ata janë në rrezik ekzekutimi.

Në të njëjtën kohë, Ministria e Inteligjencës, Organizata e Inteligjencës e IRGC-së dhe shërbime të tjera represive kanë arrestuar, thirrur, dhe kërcënuar një numër të madh të rinjsh, mbështetësish, dhe familjarësh të MEK në Teheran e provinca të tjera, si Gilan, Kermanshah, dhe Khuzestan. Gjithashtu, forcat e inteligjencës dhe sigurisë kanë kontaktuar shumë të rinj në qytete të ndryshme, duke i paralajmëruar ata që të mos kontaktojnë me MEK dhe duke i kërcënuar me pasojat e një gjëje të tillë.

Rezistenca Iraniane bën thirrje për veprim të menjëhershëm nga ana e Sekretarit të Përgjithshëm të Kombeve të Bashkuara, Këshillit të të Drejtave Njerëzore të OKB-së dhe Komisioneres së Lartë për të Drejtat e Njeriut, si dhe nga raportuesit përkatës e organizata të tjera që mbrojnë të drejtat njerëzore, për të shpëtuar jetët e të burgosurve politikë në Iran. Rezistenca përsërit thirrjen e Znj. Maryam Rajavi, Presidentes së zgjedhur të Këshillit Kombëtar të Rezistencës së Iranit (NCRI), për formimin e një delegacioni ndërkombëtar të gjetjes së fakteve i cili të vizitojë burgjet iraniane dhe të takohet me të burgosurit, sidomos të burgosurit politikë.