Javën e kaluar, burimet e inteligjencës amerikane zbuluan përmes Associated Press se ata kishin përgjuar komunikimet në janar duke treguar një komplot iranian kundër një baze ushtarake në Uashington, DC. Trupat e Gardës Revolucionare Islamike (IRGC) me sa duket konsideruan vendosjen e operativëve në tokën e SHBA në një përpjekje për të vrarë Zëvendës Shefin e Shtabit të Ushtrisë Amerikane Joseph M. Martin në Fort McNair. Sulmi do të kishte qenë të paktën përpjekja e dytë për t’u hakmarrë për vrasjen e komandantit të Forcës Quds të IRGC Qassem Soleimani pothuajse saktësisht një vit më parë. Për cilindo që i ka kushtuar vëmendje retorikës që del nga Irani, raporti i A.P. duhet të ishte një befasi e vogël. Në ditët para zbulimit të komplotit specifik, oficerët e IRGC-së dhe zyrtarë të tjerë iranianë ishin mburrur hapur për planet e tyre për të vrarë amerikanë në tokën e tyre dhe për të demonstruar zemërimin e tyre të përhershëm për vrasjen e një individi të cilin regjimi e kishte lartesuar për punën e tij në projeksionin e fuqise iraniane përtej kufijve të saj.

Soleimani kishte qenë i dobishëm në mbrojtjen e diktatorit sirian Bashar al-Assad dhe ishte udhëheqësi de facto i organizatave të shumta paraushtarake në Siri dhe Irak dhe mbështetësi kryesor i grupit terrorist Hezbollah në Liban dhe rebelët Houthi në Jemen.

Teherani është përpjekur të projektojë pushtetin në mënyrë efektive në mungesë të tij, dhe kërcënimet e fundit lehtë mund të lexohen në kontekst si një përpjekje për të shpëtuar fytyrën. Ashtu si shumica e retorikës luftarake të regjimit, ato kërcënime janë të tejmbushura. Por kjo nuk do të thotë që politikëbërësit perëndimor ose shërbimet e inteligjencës duhet t’i konsiderojnë ata si të paaftë.

Raporti i javës së kaluar nuk ishte aspak treguesi i parë dhe as më domethënësi i këtij angazhimi. Në verën e vitit 2018, rreth një vit e gjysmë para vdekjes së Soleimani, agjencitë e shumta evropiane të zbatimit të ligjit bashkëpunuan në prishjen e një komploti terrorist me eksplozivë të kontrabanduar në Austri nga një diplomat iranian, transferuar nga një çift irano-belg në Luksemburg dhe më pas kapur nga policia belge gjatë rrugës për në Francë.

Diplomati në krye të atij komploti, Assadollah Assadi, doli në gjyq në Belgjikë nëntorin e kaluar së bashku me tre bashkë-komplotistë. Të katër u dënuan në shkurt dhe Assadi u dënua me 20 vjet burg për komplot për të kryer vrasje terroriste. Prokurorët e bënë të qartë gjatë gjithë procedimit se veprimet e terroristëve nuk ishin motivuar në mënyrë të pavarur por ishin urdhëruar nga lart brenda udhëheqjes iraniane në përgjigje të kërcënimeve në rritje të Rezistencës së organizuar ndaj sistemit teokratik.

Njihuni me disa lobues iranianë në Perëndim: (nga e majta) Seyed Hossein Mousavian, Trita Parsi, Mohammad Javad zarif me Kaveh Afrasiabi

Regjimi iranian ka një histori të gjatë përpjekjesh për të ndikuar në politikën perëndimore përmes lobimit klandestin dhe fushatave të koordinuara keqinformuese. Veprimtari të tilla kanë ndihmuar për t’i turbulluar ujërat për sa i përket punës bërthamore të Iranit në të shkuarën, për të demonizuar apo denigruar grupet kryesore të opozitës iraniane, dhe thjesht për të promovuar pika bisede që janë të favorshme për regjimin klerikal, të tilla si ideja që sanksionet ekonomike janë më të dëmshme për popullsinë e përgjithshme sesa për institucionet qeveritare.

Këshilli Kombëtar Iraniano-Amerikan (NIAC) është një grup shumë i njohur në SHBA, i cili përsërit narrativat e regjimit iranian dhe, që kur ka hyrë në fuqi administrata e re, këmbëngul në kërkesën e regjimit se, sipas paktit me Iranin, Uashingtoni duhet t’i heqë të gjitha sanksionet që ishin ri-vendosur apo zgjeruar nën administratën e mëparshme, pavarësisht faktit se regjimi iranian i ka tejkaluar nivelet e akumulimit bërthamor dhe sofistikimit teknik që kishte vënë përpara se JCPOA të hynte në fuqi.

Nga fillimi i këtij muaji, Përfaqësuesja nga New Mexico, Yvette Herrell, iu bashkua tetë anëtarëve të tjerë të Dhomës së Përfaqësuesve të SHBA për t’i shkruar Departamentit të Drejtësisë që të nxisë nisjen e një hetimi me qëllim identifikimin dhe ndjekjen penale të çdo amerikani që paguhet për të prmovuar në fshehtësi pikat e bisedës të regjimit iranian. Nevoja për një hetim të tillë ishte nënvizuar më përpara nga arrestimi i Kaveh Lotfolah Afrasiabi, një ekspert i shkencave politike në Massachusetts i cili akuzohet për shkelje të Aktit të Regjistrimit të Aseteve të Huaja duke shkruar artikuj dhe opinione mbi çështjet e regjimit iranian ndërkohë që kishte marrë afërsisht 265,000 dollarë nga vetë regjimi.

Dy muaj më parë, komandanti i Forcave Quds kërcënoi se do të kryente një sulm terrorist brenda Shteteve të Bashkuara

Dje, Associated Press, sipas dy zyrtarëve të lartë të inteligjencës amerikane, ka shkruar: ”Irani ka bërë kërcënime kundër Fort McNair, një post i Ushtrisë në kryeqytetin e SHBA, si dhe kundër zëvendës shefit të shtabit të Ushtrisë, sipas dy zyrtarëve të lartë të inteligjencës amerikane. Ata thanë se komunikimet e interceptuara nga Agjencia Kombëtare e Sigurisë në janar kanë treguar se Garda Revolucionare e Iranit ka diskutuar kryerjen e “sulmeve me USS stil Cole” kundër këtij posti të Ushtrisë… Inteligjenca ka zbardhur gjithashtu kërcënime për të vrarë Gjen. Joseph M. Martin dhe plane për të infiltruar dhe survejuar instalacionin, sipas këtyre zyrtarëve, të cilët nuk ishin të autorizuar të diskutonin publikisht çështje të sigurisë kombëtare dhe folën me kusht anonimiteti.”

Më përpara, Brigadier Gjenerali Ismail Qaani i IRGC-së, komandant i Forcave terroriste Quds, të paktën dy herë, ka kërcënuar publikisht për akte terroriste brenda Shteteve të Bashkuara. “Për sa kohë që të ketë një burrë në botë, ai do të jetë i gatshëm t’i ndëshkojë frikacakët që e bënë këtë,” tha ai më 1 janar 2020, duke iu referuar eliminimit të Qassem Soleimani, komandantit të Forcave Quds, dhe shtoi: “Me këtë krim që keni kryer, keni krijuar një punë tjetër për të gjithë njerëzit e lirë në botë dhe të jeni të sigurt që dikush, edhe nga brenda shtëpisë tuaj, do t’i përgjigjet krimit tuaj.” (Televizioni shtetëror, 1 janar 2020).

Një ditë para kësaj, Qaani kishte postuar në Twitter: “Paralajmërojmë Presidentin amerikan, kreun e CIA, Sekretarin e Mbrojtjes, Sekretarin amerikan të Shtetit dhe zyrtarët e tjerë amerikanë të përfshirë në vrasjen e Dëshmorit Soleimani se duhet të mësojnë mënyrën e jetesës në fshehtësi të Salman Rushdie sepse Republika Islamike do të hakmerret për gjakun e Dëshmorit Soleimani që u derdh padrejtësisht.” (31 dhjetor 2019).

Më 10 janar 2021, Qaani kërcënoi përsëri haptazi për akte terroriste brenda Shteteve të Bashkuara në televizionin shtetëror, duke thënë: “E kemi thënë më parë, dhe po e themi edhe tani, që disfata juaj dhe hakmarrja ndaj jush ka filluar. Nuk do të mund të rrini të qetë më në shtëpitë tuaja. Është e mundshme që hakmarrja të kryhet nga brenda shtëpive tuaja, dhe në një vend tjetër, rekomandojmë që këta kriminelë kryesorë që e kryen këtë krim, nga Presidenti i Shteteve të Bashkuara e deri te ky bastardi që është tani Sekretar i Shtetit, i cili ka vite që e urren Dëshmorin Soleimani, të gjithë ata duhet të ndjekin klasën e Salman Rushdie dhe të mësojnë se si të jetojnë tani e mbrapa nga Salman Rushdie.”