Një vajzë 22-vjeçare ka hyrë në koma për shkak të dëmtimit të rëndë të trurit, pasi u sulmua nga forcat e “policisë së moralit” në Qendrën e Paraburgimit Vizara të Teheranit.
Sipas raportimeve, vajza e re, e identifikuar si Mahsa Amini, nga provinca veriperëndimore e Kurdistanit, ishte duke vizituar të afërmit e saj në Teheran. Ajo u arrestua mbrëmjen e së martës pranë stacionit të metrosë “Shahid Haqqani” nga agjentët e patrullës të policisë së moralit.
Mahsa dyshohet se është rrahur në makinë dhe kur kanë mbërritur në qendrën e paraburgimit, gjendja e saj e përgjithshme është raportuar e keqe, por ajo ishte ende e vetëdijshme.
Oficerët në qendrën e paraburgimit thuhet se e kanë injoruar gjendjen e Mahsa-s, madje edhe protesta e të burgosurve të tjerë në qendër u prit me dhunë. Raportet tregojnë se pas sulmit brenda qendrës së paraburgimit dhe protestës së familjarëve të të burgosurve, forcat e sigurisë përdorën spërkatës lotsjellës për të shpërndarë turmën.
Pas mbërritjes me vonesë të ambulancës në qendrën e paraburgimit për ta çuar vajzën e re në spital, raportohet se ajo ka rënë në koma.
Në muajt e fundit, pas shtimit të aktiviteteve të të ashtuquajturës polici e moralit e regjimit iranian dhe shtrëngimit të rregulloreve të rrepta në lidhje me hixhabin e detyrueshëm, në internet janë publikuar raporte dhe imazhe të shumta të grave që sulmohen nga forcat e sigurisë.