Thursday, March 28, 2024

Mbyllen Mbi 1,000 Llogari të Regjimit Iranian në Mediat Sociale

 Facebook, Twitter, dhe YouTube kanë bllokuar shumë llogari dhe kanale të lidhura me regjimin iranian pak javë më parë. Google bllokoi tridhjetë e nëntë kanale të lidhura me organizatën kombëtare televizive të Iranit (IRIB) në YouTube, dhe Facebook mbylli 562 faqe që besohej se i përkisnin regjimit iranian.

Gjithashtu, Twitter shpalli se kishte bllokuar 486 llogari që shkelnin rregullat dhe standartet e tij.

Më 21 gusht, Washington Post raportoi se Facebook kishte konfirmuar se regjimi iranian qëndronte prapa një operacioni mashtrues në Facebook, i cili kishte në shënjestër qindra mijëra persona në të gjithë botën.

Sipas raporteve nga Reuters, operacioni iranian i infiltrimit besohet se është shumë më i madh nga ç’ishte menduar më përpara. Reuters tha se operacioni përfshin një rrjet të gjerë uebsitesh e llogarish anonime në mediat sociale, dhe është aktiv në 11 gjuhë. Analistët e Reuters kanë identifikuar dhjetëra llogari në Facebook, Instagram, Twitter, dhe YouTube.