Dje mësuesi dhe aktivisti iranian Hashem Khastar, dyshohet se është rrëmbyer nga anëtarë të Ministrisë së Inteligjencës në Mashhad. Khastar është kreu i Shoqatës së Tregtisë së Mësuesve Iranianë në rajonin Golbahar të Mashhadit.
Sipas raporteve, ai është rrëmbyer para se të hynte në tokat e familjes së tij dhe është dërguar në një vend të panjohur. Celularin e kishte të fikur, dhe makinën e kishte të parkuar jashtë pronës së tij në Parkun Golbahar. Familja dhe miqtë janë shumë të shqetësuar për sigurinë e tij.
Khastar ka falenderuar mësuesit grevistë dhe ka kritikuar regjimin iranian në një letër të shkruar pas grevës dy-ditëshe mbarëkombëtare të mësuesve. “Ne nuk kemi armë. Armët tona janë penat, fjalët, tubimet e protestat tona. Armët janë në duart e atyre që mbrojnë sunduesit e paligjshëm, tiranë e mizorë në vend që të mbrojnë rregullin e ligjit. Mbrojnë ata që vjedhin miliona ndërkohë që arrestojnë hajdutër të vegjël dhe u presin duart e këmbët,” lexon letra.
Ditën para se të zhdukej, mësuesi pensionist shkroi gjithashtu një artikull të cilin ia dërgoi disa uebsiteve perse të lajmeve për ta publikuar. Në të, ai i thotë popullit iranian “Irani do të çlirohet së shpejti nga ky ferr.” Ai i nxiste gjithashtu iranianët që të ngrihen kundër regjimit, duke thënë, “Fëmijët tuaj në burgje mund të shkruajnë një letër të shkurtër e të pendohen në mënyrë që të dalin nga burgu e të vazhdojnë jetët e tyre. Por ata i japin popullit mësimin e rezistencës duke i thënë jo tiranisë. Ata i mësojnë popullit se njeriu mund të ngrihet kundër tiranisë si kombet e tjera për të realizuar lirinë dhe demokracinë.”
Ai merrte në shënjestër Liderin Suprem, duke thënë se “rrënja e korrupsionit dhe e të gjitha problemeve është Ali Khamenei,” dhe se ai duhet të vihet përpara përgjegjësisë.
