Shkruar nga Shahriar Kia
Foto fajli
Ditët e fundit, autoritetet e Libanit kanë shpallur se kanë marrë dërgesën e tretë me karburant nga Irani. Ndërkohë, iranianët vuajnë nga ndërprerje të vazhdueshme të elektricitetit në mesin e përkeqësimit të krizës së Covid-19. Po pse? A nuk do ta shtonte kjo gjë edhe më shumë trazimin e shoqërisë apo izolimin ndërkombëtar të regjimit?
Më 19 gusht, AP raportoi “Lideri i grupit militant Hezbollah të Libanit tha të enjten se një anije-cisternë iraniane do të lundrojë drejt Libanit ‘brenda pak orësh.’” Kjo ishte dërgesa e parë e karburantit nga Irani në Liban.
AP tha se “kjo dërgesë, e organizuar nga Hezbollahu i mbështetur nga Irani, do t’i shkelte sanksionet amerikane.
“Republika Islamike është e gatshme për të ndërtuar një central energjie në Liban,” tha të premten Mohammad Javad Firouznia, ambasadori i regjimit në Liban, sipas shtetërores Barkat News.
“Këto shpenzime po dalin nga xhepat e popullit iranian, ndërkohë që ndërprerjet e shumta të elektricitetit kanë shkaktuar probleme serioze për jetën dhe mirëqenien e tij,” shton Barkat News. Por në vend që ta zgjidhë krizën e ndërprerjeve të energjisë në Iran, Ministria e Energjisë e regjimit vetëm shpall “ndërprerje të planifikuara.”
Regjimi pretendon se nuk ka karburant të mjaftueshëm për centralet e energjisë, prandaj përdor naftë, e cila shkakton ndotje të ajrit, duke ndikuar edhe më negativisht tek problemet e frymëmarrjes të njerëzve, ndërkohë që rastet e infektimeve me Covid-19 po shtohen.
Ndërprerjet e vazhdueshme të energjisë në Iran ndikojnë negativisht tek jeta e përditshme e njerëzve dhe shtojnë numrin e viktimave nga Covid-19 për shkak të mos-funksionimit të pajisjeve të oksigjenit.
“Sipas Dr. Hamid Emadi, kreut të Departamentit të Sëmundjeve Infektive të Spitalit Khomeini, këto ditë, ndërprerjet e energjisë kanë shkaktuar probleme pulmonare tek pacientët e diagnostikuar me Covid-19. Kjo sepse një nga trajtimet bazë për këta pacientë është përdorimi i pajisjes së oksigjenit,” pohoi e përditshmja shtetërore Jahan-e Sanat më 24 maj.
Krahas krizës së Covid-19, qytetarët kanë përjetuar vështirësi gjatë verës edhe për shkak të vapës së madhe.
Ndërprerjet e vazhdueshme të elektricitetit në Iran shkaktohen nga disa faktorë:
- Regjimi konsumon një pjesë të madhe të elektricitetit të Iranit për të nxjerrë kriptomonedha.
- Regjimi eksporton elektricitet jashtë vendit për të gjeneruar të ardhura.
- Regjimi pretendon se nuk ka karburant të mjaftueshëm për centralet e energjisë, kështu që ose duhet të përdorë naftë, që është një substancë tejet ndotse, ose populli duhet të durojë ndërprerjet e energjisë.
Regjimi iranian i dërgon karburant Libanit me afrimin e vjeshtës dhe dimrit, dhe dimrin e kaluar e ka lënë popullin iranian të vuajë nga i ftohti. Më 12 janar, në tetë provinca pati ndërprerje të gjera dhe të njëpasnjëshme. Këto ndërprerje të energjisë u shtrinë edhe në shtatë provinca të tjera, konkretisht Gilan, Alborz, Khorasan Qendror, Mashhad, Markazi, Semnan, Qom, dhe Ardabil.
Gjithashtu, populli iranian është dëshmitar i faktit që regjimi po ia plaçkit pasuritë kombëtare dhe po e lë atë në varfëri e kriza të tjera. Kështu, urrejtja ndaj regjimit shtohet. Gjatë protestave, populli e ka nënvizuar shumë herë që “as për Gazan, as për Libanin, jeta ime vetëm për Iranin,” duke i kundërshtuar politikat luftënxitëse të regjimit.
Dërgimi i karburantit në Liban nuk është zgjidhje afatgjatë për problemet e Hezbollahut. Populli e refuzon gjithashtu propagandën e regjimit se nuk ka burime të mjaftueshme për ta ndihmuar popullin e vet në mesin e krizës së Covid-19.
Si rrjedhojë, mund të thuhet pa frikë se Teherani gjendet në një rrugë pa krye, dhe këto hapa nuk do t’i zgjidhin krizat e tij të brendshme, rajonale dhe ndërkombëtare, por vetëm sa do t’i përkeqësojnë ato.